Daprè  yon rapò Nasyonzini fèk pibliye,  ane soufinansman èd imanitè yo ak bezwen yo  k ap vin pi plis jou aprè jou  lakòz plizyè milyon ayisyen riske tonbe sou ladegraba nèt alkole.Biwo imanitè Nasyonzini  OCHA  fè konnen , nan yon dènye nòt li te mete deyò, pou ranvèse sitiyasyon sa a ki la a, kominote entènasyonal la ak tout donatè yo pral bezwen ogmante finansman pou operasyon sekou  Nasyonzini ak òganizasyon non-gouvènmantal yo.Grangou ak bezwen yo k ap vin pi plisMwa vyolans yo te lakoz   kriz imanitè a vin pi grav nan peyi Dayiti. Kantite moun k ap deplase kite lakay yo te triple pandan ane ki sot pase a nan peyi zile Karayib la pandan vyolans gang yo kontinye  vale tèren e fòse anviwon 600,000 moun pete kouri kite kay yo.OCHA  di: "Vyolans san paspouki gwoup ame yo ak efondreman sèvis debaz yo lage Ayiti nan yon kriz imanitè san parèy depi lane 2010," lè l fè referans a tranblemanntè goudougoudou ki te frape peyi a sa gen 14 ane.Rapò  ki chita sou dènye chif ki soti nan OIM ki se Òganizasyon Entènasyonal pou Migrasyon pou Peyi  Dayiti fè konnen apre sitiyasyon sekirite a  te vin pi malouk nan Pòtoprens wonn kapital la,  nan Latibonit, ak nan nò peyi a, nan mwa fevrye a, kantite moun ki deplase yo ogmante rive nan 60%.Efondreman nan sèvis debaz yoSelon OCHA, zak vyolans yo kontinye vize enfrastrikti sivil yo e se sèlman 24% nan lopital yo kap fonksyone toujou. Ensekirite a rive lakoz tou  1.5 milyon timoun pa ka chita sou ban lekòl.Mwatye nan 578,000 moun ki deplase yo, ki sove  kite kapital la san konnen kilè y ap retounen al pran refij nan sid peyi a, kote  majorite nan yo ap fè ladesant  kay kèk fanmi ki deja p at kòdjanm e ki pa t gen gwo mwayen ekonomik.Daprè OCHA,  sèvis sosyal debaz yo, tankou ledikasyon, lasante, dlo, ijyèn ak asenisman, ki deja pat ase pou satisfè bezwen popilasyon lokal la, ap sibi gwo presyon.Gwo vag depòtasyonPeyi nan rejyon an kontinye ap pouse do  ayisyen ki vin bouske lavi lakay yo. Nan ka sa a, OCHA tounen rapòte ke kantite  sitwayen ayisyen ki  depòte te ogmante, espesyalman nan mwa avril, lè vag vyolans yo te nan nivo ki te pi  wo a.Daprè done OIM  genyen, nan sèt premye mwa  nan ane a, peyi nan rejyon an  te pimpe tounen anviwon 100,000 ayisyen kite lakay li.Vag vyolans yoEklatman vyolans ki sòti  nan afwontman ant  gang ak otorite yo te  toujou pèsiste tou, malgre Misyon Sipò Sekirite Miltinasyonal la te rive nan fen mwa jen pou ede lapolis peyi Dayiti a fè fas kare ak kriz ki la a.OCHA fè konnen nan rapò li a "Vag vyolans sa yo kontinye gen gwo konsekans imanitè sou popilasyon katye ak lokalite ki afekte yo, men tou  sou moun nan lòt zòn ki lwen kapital la ki tounen tè ​​akèy pou plizyè santèn milye moun".Prèske 300,000 ka malnitrisyon  te anrejistre epi senk milyon moun ki reprezante anviwon 50% popilasyon ayisyen an,  ap fè fas ak ensekirite alimantè, dapre yon rapò ki te pibliye pi bonè ane sa a pa yon gwoup suivi mondyal, kad  Entegre klasifikasyon sekirite alimantè (IPC).Apèl pou bouche twou vid ki genyen nan finansman anAnplis de sa, rapò OCHA fè  kwè, gen laperèz ak gwo kè kase pou wonn sant kriz imanitè n ap viv la a pa ta deplase piti piti pou al taye banda  nan yon kantite  zòn ki pat ko janm  touche pa ensekirite a.Anmenmtan, yo prevwa sezon siklònik  lan ka aktif e li kapab  menm rive ogmante traka pèp ayisyen an ap fè fas chak jou.Ayiti ta dwe ap prepare l  pou fè fas ak ant kat ak sèt gwo tanpèt nan mwa kap vini yo. Apèl pou bouche twou vid ki genyen nan finansman anOCHA  fè konnen ke plis resous finansye  nesesè anpil  pou rive bay bonjan repons  ak kriz miltidimansyonèl sa a  e  pou rive satisfè  bezwen popilasyon ayisyen an k ap vin pi plis chak jou.Si pa gen okenn jèfò ki fèt pou rive kreye yon  fon adisyonèl, OCHA gen anpil laperèz pou kriz sa yo pa kontinye  vale tèren.Daprè OCHA, plizyè santèn milye timoun ki pa ale lekòl pral fè fas ak risk pou yo rekrite pa gwoup ame epi yo pral pèdi anpil ane e y ap  grandi san yo pa gen  konpetans ki nesesè k ap pèmèt yo viv  e rive gen yon demen miyò.  Mwatye milyon timoun ki vilnerab e ki te deja viktim  nan kèk ensidan pa pral ka benefisye sèvis sante mantal ak sipò sikososyal.Biwo Nasyonzini pou Kwòdinasyon Imanitè fè konnen :"Pandan  èd imanitè a se yon  gwo sekou pou anpil moun, men li se sèlman yon pati nan solisyon an," sa se deklarasyon Biwo Nasyonzini pou Kowòdinasyon Imanitè.OCHA te di tou "Gouvènman an, aktè politik yo ak aktè devlopman yo dwe travay ansanm pou jwenn solisyon dirab ak defi estriktirèl peyi Dayiti yo," . Epi pawòl sa yo te fè eko nan yon apèl ki te lanse mwa pase a pa yon misyon Nasyonzini ansanm ak Inyon Ewopeyèn an nan peyi a.Pandansetan, nou nan uityèm mwa ane a, Plan Repons Imanitè 2024 Ayiti a,  finanse sèlman ak 33% , li te resevwa  selman $162.5 milyon dola sou $674 milyon dola. Atik sa a te pibliye nan nouvèl Nasyonzini., filtered_html

Yon fon mondyal ki jwenn jarèt Nasyonzini pou kore edikasyon lè gen ka ijans, pral bay 2.5 milyon dola pou pèmèt plizyè milye timoun ki afekte pa vyolans gang yo nan peyi Dayiti kapab ale lekòl san danje.Yasmin Cherif, yo konnen tou sou non Yasmine Sherif, direktris egzekitif Edikasyon pa ka tann (ECW), anonse sibvansyon an vandredi nan Pòtoprens kapital peyi Dayiti, pandan dewoulman yon misyon wo nivo Nasyonzini nan mitan peyi Karayib sa a.Objektif la se rive jwenn prèske 75,000 timoun ak adolesan ki afekte anpil nan depatman Lwès, kote kapital la ye a, ak nan depatman Latibonit.Pouvwa edikasyonMadam Cherif mande dirijan mondyal yo pou yo pa vire do bay ti gason ak tifi yo nan peyi Dayiti.Li te di:"Ak pouvwa edikasyon genyen, nou ka rive pwoteje tifi ak ti gason sa yo kont gwo risk vyolans seksyèl, rekritman fòse nan gwoup ame ak lòt vyolasyon dwa moun ankò,".Madam nan kontinye pou l di:“Ak pouvwa edikasyon genyen an, nou ka fè yon nasyon alawonnbadè sòti deyò nan wonn grangou, povrete, ensètitid ekonomik ak vyolans ki pa janm kanpe yo. »Fon Nasyonzini pou Timoun, ki rele Inisèf oubyen UNICEF, pral debouse lajan sibvansyon an nan bonjan kolaborasyon ak Pwogram Alimantè Mondyal la (PAM) epi nan kolaborasyon tou ak lòt patnè lokal ak entènasyonal yo.Finansman an pral itilize pou pèmèt timoun yo jwenn aksè ak aprantisaj nan yon anviwònman ki san danje e li pral sipòte ankourajman pou rantre lekòl la ki gen ladan l pwogram manje lekòl, edikasyon timoun piti, enklizyon moun andikape yo, pwogram sante mantal ak sipò sikososyal, transfè lajan kach bay fanmi ki nan bezwen ak lòt fòm sipò toujou.Bezwen imanitè ijan yoAyiti ap fè eksperyans ak yon kokenn chenn dezòd , anachi ak zak kraze brize ki rive nan yon nivo ki san parèy anba ponyèt kowalisyon gang ame yo. Sitiyasyon an vin anpire nèt ak chanjman klimatik, siklòn ak tranblemanntè yo, kote yonn ladan yo, nan lane 2021, te touye plis pase 2,300 moun epi ki te lakòz gwo domaj. Prèske mwatye nan popilasyon an, 5.5 milyon moun, depann de èd imanitè, pandan senk milyon ladan yo ap soufri ak gwo grangou nan vant yo chak jou ki jou. Prèske 580,000 Ayisyen deplase e sa reprezante yon ogmantasyon 60% depi fen mwa fevriye.Gwoup ame yo ap atake lekòl ak lopital, e gen rapò ki twoublan sou egzistans fòm vyolans seksyèl ki san pitye, tankou vyòl kolektif. Yo akize gwoup ame yo tou pou fòse yo fòse timoun entegre yo, e yo estime ke 30 a 50 pousan nan manm gwoup ame yo kapab timoun.Kriz edikasyon an kontinye grandiAnplis de sa, estimasyon yo endike ke 1.2 milyon timoun ki gen laj pou ale lekòl bezwen an ijans bon jan kalite edikasyon.Nan tout peyi a, lekòl yo fèmen e yo itilize yo tou kòm sit pou mete moun ki deplase yo . Anviwon 919 lekòl fèmen nan depatman Lwès ak Latibonit sèlman, sa ki reprezante 10% nan tout lekòl ki gen nan rejyon sa yo.Brino Mayes yo rele tou Bruno Maes, reprezantan Inisèf (UNICEF) nan peyi a, di: “Kriz edikasyon peyi Dayiti a sou wout ladegraba pou l vin tounen yon trajedi edikasyon.“Pandan pousantaj enskripsyon lekòl yo te deja ba anvan dènye eskalad vyolans yo, fèmti lekòl yo ak deplasman an mas yo ap anpeche plizyè milye lòt timoun pa gen chans ditou pou yo aprann. »Devlope envèstisman yo nan tout mond lanSibvansyon sa a pote yon finansman pou Edikasyon pa ka tann (ECW) nan peyi Dayiti ki evalye a plis pase $15.8 milyon.Daprè Biwo Afè Imanitè Nasyonzini an, OCHA, malgre bezwen ijan yo, Edikasyon pa ka tann (ECW) te fè konnen se 30 milyon dola ki nesesè pou bay repons ak edikasyon an nan peyi Dayiti ki se yon pati nan yon plan imanitè jeneral pou peyi a - ebyen se mwens pase 30 pousan ki deja finanse.Edikasyon pa ka tann (ECW) sipòte bon jan kalite edikasyon pou timoun refijye yo, moun ki deplase ki toujou rete nan pwòp peyi yo ak lòt timoun kriz yo afekte. Fon Edikasyon an ak tout patnè li yo ap mande lidè mondyal yo pou yo mobilize an ijans yon lòt $600 milyon dola pou plan estratejik twazan li yo.Nouvo resous sa yo pral pèmèt fon an ogmante envèstisman li nan peyi Dayiti ak nan lòt rejyon ki nan kriz, pou rive jwenn 20 milyon tifi ak ti gason. Atik sa a te pibliye nan nouvèl Nasyonzini., filtered_html

Daprè Abdoulaye Sawadogo, chèf biwo kwòdinasyon imanitè Nasyonzini an, OCHA, nan nasyon zile Karayib la , tout moso twal sosyal fanmi yo ap depyese nan peyi Dayiti pandan kantite moun k ap pete kouri deplase kite lakay yo nan peyi a rive nan nivo moun pa t espere ditou, sitou akòz ensekirite ak zak vyolans gang yo.Kantite moun ki te oblije kite kay yo te monte rive nan 362,000 depi kòmansman mwa mas e chif sa yo te vin pase ak 578 000 nan mwa jen lè vag vyolans yo te rèd anpil nan wonn Pòtoprens kapital Peyi Dayiti,  e sa fè wè kantite moun ki deplase yo konnen yon ogmantasyon 60% nan twa mwa sèlman.Nan ka sa a, kisa k ap fèt nan peyi Dayiti lè moun yo deplase e ki repons Nasyonzini bay ak sa?Menm jan ak tout lòt repons nenpòt lòt kriz , premye etap la se evalye echèl deplasman an epi reponn ak bezwen imanitè imedya moun yo ki deplase pete kouri kite kay yo, souvan britsoukou e de men balan.Èd pa ka livre nan mitan fiziyadOCHA kowòdone mekanis repons lan ak gouvènman ayisyen an, òganizasyon non-gouvènmantal yo (ONG) lokal ak patnè entènasyonal yo. Men Daprè Mesye Sawadogo, sa a se pa yon travay ki senp nan peyi Dayiti, Daprè nouvèl Nasyonzini yo anpil moun konnen sou non UN News "Vyolans ki te fòse moun ki deplase yo pete kouri kite lakay yo a, tounen barikad tou pou bloke repons lan," . "Èd pa ka livre tout bon vre kote bal ap pete san rete. »Òganizasyon Entènasyonal Nasyonzini pou Migrasyon (OIM) travay ak patnè ONG ayisyen yo ki gen ekip sou teren pou rankontre moun epi aprann plis sou sitiyasyon endividyèl yo. Pwoteje mounMoun, sitou fanm ak timoun, vilnerab anpil lè lavi yo an boulatcha epii vire tèt anba pa yon evènman tankou pete kouri deplase pou sove lavi yo. Yo riske tonbe anba vyolans, agresyon seksyèl, eksplwatasyon, abi ak separasyon ak fanmi yo. Genyen bonjan prèv ki montre byen klè yo fòse anpil timoun travay pou gang yo.Nasyonzini ap asire yo pwoteje yo pandan l ap ede gouvènman ayisyen an bay moun sa yo dokiman legal ak pwoteksyon sosyal, ede yo jwenn aksè sèvis ak pwoteksyon kont eksplwatasyon ak abi.OIM, ajans Nasyonzini pou sante seksyèl ak repwodiksyon, UNFPA, Fon Nasyonzini pou Timoun (UNICEF) ak ONG ayisyen tankou Fondasyon Toya ak Kay Fanm se pami òganizasyon ki bay sipò sikososyal pou moun ki twomatize yo, tankou timoun.Preparasyon pou deplasmanYonn nan eleman kle ki toujou prezan nan nenpòt repons y ap bay ak deplasman se toujou fè ppreparasyon pou entèvni san kalbende nan yon anviwònman ki souvan enstab epi ki ranpli ak anpil danje.Daprè Mesye Sawadogo, li enpòtan tou pou gen "resous finansyè, ase anplwaye, aksè ak kote moun ki deplase yo ye a epi san wete sipò gouvènman an".Lojistik pou bay èd imanitè jwe yon wòl enpòtan. Nan mwa jen, Pwogram Alimantè Mondyal la (PAM) te transpòte pa avyon plis pase 55 tòn medikaman ak materyèl pou fè abri pou moun ki te deplase yo, ansanm ak lòt pou mete nan stock anvan sezon siklòn yo.ONG entènasyonal Medsen San Frontyè (MSF), ke yo rele Médecins Sans Frontières, te transpòte pa avyon tou 80 tòn medikaman pou sipòte operasyon li yo nan kapital Pòtoprens.Asistans yo bay yo espesifik pou chak sitiyasyon se vre, men jeneralman yo konsantre sou sante, lojman, manje, dlo ak sanitasyon, ansanm ak sipò sikososyal.Sipò ekip yoDepi mwa mas, Nasyonzini te distribye plis pase 21 milyon lit dlo bay moun ki deplase yo nan Pòtoprens, plis pase 60,000 moun te transfere soti nan pwogram manje cho PAM nan pou al benefisye transfè lajan kach epi plizyè milye ayisyen te resevwa èd medikal ak sikososyal. sipò.OIM, INISEF ak patnè lokal yo te bay materyèl abri ijans ak atik esansyèl ki pa manje tankou dra, atik kuizin ak twous ijyèn. Yo te asire tou aksè ak dlo pwòp, enstalasyon sanitasyon ak pwomosyon ijyèn pou anpeche epidemi maladi yo.Òganizasyon Panameriken pou Lasante Nasyonzini (OPS)/Òganizasyon Mondyal Lasante (OMS) ak lòt ajans sante yo te mete etablisman sante tanporè, yo te bay swen medikal epi yo te fè kanpay vaksinasyon yo.Mwa pase a, INISEF te ogmante prezans li tou nan Lewogàn, nan lwès Pòtoprens, kote anviwon 33,000 moun te kouri met deyò apre yon ogmantasyon nan zak vyolans gang yo nan mwa me. Ajans la te di ke de tyè nan moun ki deplase yo se fanm ak timoun. Foul moun yo te mete gwo presyon sou edikasyon lokal, sante ak lòt sèvis esansyèl."Nou ta ka fè plis toujou si nou te gen plis resous," se sa Mesye Sawadogo te di. “Sepandan, nan 674 milyon dola apèl imanitè ane sa a se mwens pase 25 pousan ki deja finanse, sèt mwa depi ane a kòmanse, sa ki reprezante yon gwo defi. » Detripe twal sosyal laDapre OIM, nan nivo nasyonal, 80% nan moun ki deplase yo ap viv ak fanmi akèy pandan rès yo rete viv nan sit enpwovize souvan nan zòn gang yo kontwole oswa nan zòn ki gen gwo risk. Nan blòk sid peyi a, ajans la estime ke 99% moun ki deplase yo ap viv ak fanmi akèy.Anpil moun pa kapab oswa pa vle retounen lakay yo epi , nan ka sa a ,yo dwe rete nan sit tanporè pou yon bon bout tan.Kòm rezilta, “tout twal sosyal fanmi yo ap depatcha paske manm fanmi yo separe, travay yo pèdi, lekòl yo fèmen ak sèvis sante yo ki tonbe plat atè, ” se sa Madam Sawadogo nan OCHA fè konnen.Nan sitiyasyon sa yo, Nasyonzini te konsantre l sou bay sipò alontèm pou asire, pa egzanp, lekòl timoun yo. Nan kèk ka, yo mete pwogram mwayen pou viv pou ede moun ki deplase yo repran otonomi yo. Pwogram sa yo kapab genyen fòmasyon pwofesyonèl ak aktivite ki bay revni, ansanm ak semans, zouti ak fòmasyon pou kiltivatè yo. Tounen lakayPi gwo objektif la se fasilite moun ki deplase yo retounen lakay yo, depi y ap an sekirite epi depi yo vle fè sa tou.Nan ka kote retounen pa posib, Nasyonzini ede moun ki deplase yo nan sit osnon nan nouvo kote yo etabli yo."Chak kriz gen espesifikasyon li , pwòp chòk li ," se sa Mesye Sawadogo te di. “Kèlkeswa kriz la, nou fè efò pou nou bay èd ak asistans prese prese ak moun ki bezwen yo epi ede yo retounen nan lavi nòmal la ankò. »Pou aprann plis toujou sou asistans Nasyonzini, klike sou. Atik sa a te pibliye nan nouvèl Nasyonzini., filtered_html

Nan fen yon vizit 4 jou nan peyi Dayiti, yon gwo ofisyèl imanitè Nasyonzini te ensiste vandredi sou fason popilasyon an bouke ak vyolans e li vle  rale yon souf epi tounen jwenn vi nòmal la ankò.Pandan vizit la, Direktris Operasyon ak Defans Biwo Nasyonzini pou Kwòdinasyon Afè Imanitè (OCHA), Edem wosòni, yo konnen tou sou non Edem Wosornu, te vizite plizyè sit pwojè èd imanitè e li te rankontre ak kominote ki afekte yo, otorite ayisyen yo, ansanm ak patnè nasyonal, entènasyonal ak lokal yo, pou chita pale epi brase lide sou kriz imanitè nan peyi a, ansanm ak estrateji ki ka bay plis rezilta pase semp èd ijans.Vizit sa a, li te dirije ansanm ak Lisya Elmi yo konnen tou sou non Lucia Elmi ki se Direktris Pwogram Ijans Inisèf (UNICEF) ak Andreya kouleyma yo konnen sou non Andrea Koulaimah, ki soti nan Depatman Operasyon Èd Imanitè Komisyon Ewopeyen an, te rive fèt nan yon moman kote Ayiti ap sibi yon kriz imanitè grav, k ap detèryore nètalkole chak jou depi mwa mas ane sa a, kote vag vyolans yo pa sispann vale tèren nan kapital Pòtoprens peyi Dayiti.Kounye a, nan peyi Dayiti, plis pase 578,000 moun pete kouri deplase kite kay yo e plis pase 900 lekòl fèmen pòt yo depi janvye sa vledi  plis pase mwatye  nan lekòl yo fèmen pou ane a. Apeprè 40% kote ki bay swen sante nan Pòtoprens fèmen. Retounen jwenn  lavi nòmal la ankòMadam wosòni (Wosornu) te fè konnen: “Popilasyon ayisyen an ap mande twa bagay. Li mande pou lapè blayi, li mande pou vyolans gang yo sispann, li mande pou reprann kontwòl tout tèritwa pèdi yo,”.Li di tou:“Timoun mwen bat bouch avèk yo nan Gonayiv, Okay men tou nan Pòtoprens ap mande pou yo kapab retounen lekòl. Timoun mwen rankontre yo vle vin doktè, avoka, pwofesè, enfimyè. Popilasyon ayisyen an bouke ak vyolans. Popilasyon ayisyen an vle rejwenn vi nòmal la ankò”Dapre li, patnè imanitè yo fè  pati  solisyon an, men Nasyonzini bezwen patnè devlopman yo tou pou rive mete nan wonn sant lan apwòch k ap bay rezilta  k ap dire plis tan .Li te di:“Nou dwe asire n kote  k ap bay swen lasante nan peyi  a kapab ede popilasyon an tout bon vre. Nou bezwen asire n tou enstitisyon edikasyon yo  kapab ede moun yo vre. Solisyon k ap dire ampil tan  yo nesesè menm jan ak solisyon rapid vit pou yon ti  bout tan yo, ".“1.6 milyon nan 5 milyon moun nan peyi  a ki tonbe nan ensekirite alimantè bezwen  èd ki paka tann. Yon peyi ki pwodui mango agogo, bannann, yanm ak bannann, ki gen tè ​​rich e ki fètil anpil pa ta dwe gen okenn plas pou ensekirite alimantè banbile. Vyolans lan dwe sispann pou pèmèt moun yo retounen nan fèm ak nan jaden  yo epi pou yo kapab viv lavi yo,” se sa Madam Wosòni (Wosornu) te di. Manda Bini (BINUH) pwolonje pou yon aneNan yon rezolisyon ki te pran vandredi kote  tout moun ki te la yo te dakò, Konsèy Sekirite a te deside pwolonje jiska 15 jiyè 2025 manda Bini (BINUH) Biwo entegre Nasyonzini nan peyi Dayiti.Nan tèks sa a, Konsèy Sekirite a bat bravo lakontantman pou tablisman sistèm gouvènans tranzisyon nan peyi Dayiti a, ansanm ak kreyasyon Konsèy Tranzisyon Prezidansyèl la e pou enstalasyon Premye Minis pwovizwa a ak kabinè l.Manm Konsèy la fè konnen ankò nesesite pou tout moun ki gen enterè nan Ayiti yo “kontinye mennen yon pwosesis politik k ap pèmèt yo òganize eleksyon prezidansyèl ak lejislatif ki fyab, lib e jis, tout moun ladan l, egalego, nan bonjan sekirite kote fanm yo ak  jèn yo, sosyete sivil la ak lòt moun ki konsène ankò kapab patisipe san grate tèt jan sa dwe ye.”An patikilye, yo ankouraje tout moun ki gen enterè pou peyi Dayiti "pou kreye san pèdi tan yon Konsèy Elektoral Pwovizwa epi dakò sou yon plan pou eleksyon ki dirab ka rive fèt san traka ak tèt chaje". Satisfè bezwen Misyon miltinasyonal laNan rezolisyon li a, Konsèy Sekirite a kondane nètalkole ak tout fòs li ogmantasyon zak vyolans yo, aktivite kriminèl yo, deplasman masiv sivil yo ak vyolasyon dwa moun yo nan peyi Dayiti.Li note ak anpil kè kase  konsekans dinamik krim òganize transnasyonal yo genyen sou kondisyon sekirite nan peyi Dayiti, sitou  zafè komès ilegal zam, minisyon ak trafik dwòg.Konsèy Sekirite a mande ak tout fòs li pou Eta Manb yo aplike san pèdi tan anbago tèritoryal sou zam  yo te prevwa nan rezolisyon 2699 (2023) ak 2700 (2023) epi pou yo entèdi tout tranzaksyon ki gen rapò ak zam tankou  achte, vann oswa transfere  zam menm sa ki tou piti oubyen lejè ak minisyon bay moun ki pa prensipal aktè nan leta peyi Dayiti  ki konn patisipe nan vyolans òganize gang yo, aktivite kriminèl oswa abi dwa moun nan peyi Dayiti, konsa   tout mezi ki nesesè ap rive pran pou bloke tout komès ki pa otorize sitou  sa yo ki chita sou detounman.Konsèy la raple rezolisyon 2699 (2023) kote li te otorize deplwaman yon Misyon Sipò pou Sekirite Miltinasyonal (MMAS) nan peyi Dayiti nan lide pou sipòte tout aksyon Polis Nasyonal Dayiti a ap  fè pou retabli sekirite.Li ankouraje Eta Manb yo, sitou peyi nan rejyon an, pou yo bay Polis Nasyonal peyi Dayiti a sipò nan kesyon sekirite epi li mete aksan tou sou "pi plis efò" ki dwe fèt pou rive satisfè bidjè epi reponn ak ezijans operasyonèl misyon miltinasyonal la. Atik sa a te pibliye nan nouvèl Nasyonzini., filtered_html