Salon mondyal Chokola : yon bèl okasyon pou ekspoze epi mete valè sou kakawo bon kalite ak rafine ki soti Ayiti
30 oktòb 2024
Pwojè Ranfòsman Kapasite agrikòl gras ak Fòmasyon ak Envestisman teknolojik (PWOFI)/Patisipasyon yon delegasyon ayisyèn nan Salon mondyal Chokola
Soti 30 oktòb pou rive 3 novanm 2024, kakawo ayisyen an pral taye banda nan 29e edisyon Salon mondyal Chokola k ap fèt nan vil Pari, Pòt Vèsay. Ak sipò Òganizasyon entènasyonal Travay (OIT), nan kad pwojè PWOFI ki jwenn finansman ministè Afè etranjè peyi Nòvèj, plizyè aktè nan filyè kakawo a tankou KALEOS S.A., KAÛNA CHOCO, Asosyasyon Fanm Solidè Danmari (AFESDAM), Platfòm Koperativ Agrikòl Grandans (PLACAGA), AZAKA, GEONOVA – pral patisipe pou ekspoze epi vann pwodui ki sòti nan kakawo ak sa yo transfòme, yon mannyè pou montre richès ak opòtinite ki genyen nan filyè sa a.
Divès patnè sa yo k ap travay nan diferan nivo nan filyè sa a mete tèt yo ansanm epi deside pou yo pote yon sèl pawòl pou fè moun konnen kijan kakawo ki soti nan tè DAyiti bon epi li espesyal. Yo pral bay yon mesaj rezilyans ak lespwa pwodiktris ak pwodiktè yo ki envesti fòs ak kouray yo nan kakazo a, malgre gen anpil defi ak difikilte nou jwenn sou wout nou. Nan Salon mondyal Chokola sa a, patnè OIT yo pral montre sa yo ka fè nan kilti kakawo a ak jan yo ka transfòme l; yo pral pale tou sou inovasyon yo pote nan filyè a k ap ede aktè yo rale yon souf. Se jefò sa yo ki te pèmèt Ayiti jwenn sètifikasyon komès ekitab la plizyè fwa.
Pwojè PWOFI pral montre jefò ki fèt pou pwopoze negosyan yo yon kakawo fèmante k ap pèmèt pwodiktè yo jwenn revni ekitab ak desan. Antrepriz patnè yo pral prezante, ekspoze epi pèmèt vizitè yo goute kakawo ki plante nan tè DAyiti ki rich epi espesyal. Gou kakawo sa a ki fin transfòme a fè pati gou ki pi rafine epi ki fè dlo koule nan bouch. Nan salon sa a, yo pral pale sou kijan yo rive entegre teknoloji nan jesyon ak nan enfrastrikti filyè kakawo a, gras ak yon sistèm entèlijans lojistik ki pèmèt yo rive genyen pwen lokalizasyon (GPS) jaden yo ak pwodiktè yo. Sa pèmèt gen transparans nan chèn valè a, fyabilite nan sistèm trasabilite a, ak done fyab epi ki aktyalize. Done sa yo pèmèt bon jan analiz ak evalyasyon fèt sou chèn valè a, yon fason pou pran bon desizyon. Ranfòsman kapasite founisè sèvis agrikòl yo, enplikasyon ak otonomizasyon fanm yo, ak ranfòsman koperativ pwodiktè yo se pami sijè ki pral pale pandan salon an pou montre nivo rezilyans ki genyen nan yon peyi ki souvan gen kriz tout kalite tankou katastwòf natirèl yo.
Patisipasyon Ayiti nan Salon mondyal Chokola montre klè tout potansyèl ak divès opòtinite Ayiti genyen nan plizyè domèn, espesyalman nan domèn agrikilti. Patisipasyon sa a bay lespwa e se yon egzanp pou montre gen posiblite pou aktè ki gen konpetans ak eksperyans diferan rive mete tèt yo ansanm nan tout domèn pou fè bon jan enpak epi chanje kondisyon lavi moun nan popilasyon an.
Pyès atache: Bwochi patisipasyon Ayiti nan salon an (ki pale sou pwojè PWOFI ak antrepriz k ap patisipe yo)
Antite LONI ki ap patisipe nan inisyativ sa a
Objektif nou ap sipòte ak inisyativ sa a
