Istwa nou yo. Jwen plis enfòmasyon sou travay n’ap fè pou reyaize objektif devlopman dirab yo.

Pa UNICEF AyitiPòtoprens, Ayiti, 8 avril 2026 – Gouvènman Ayiti a, an patenarya ak UNICEF epi avèk sipò Kanada, inogire nan dat 7 ak 8 avril de (2) nouvo lekòl nasyonal ki fenk konstwi nan Gran Sid la. Inogirasyon sa yo make yon gwo pa annavan nan ranfòsman aksè timoun yo a yon edikasyon kalite an Ayiti.Inogirasyon lekòl nasyonal Ducis, nan Tòbek (Sid), ak lekòl nasyonal Plezans, nan Nip, fèt nan yon kontèks kote kriz imanitè a ap vin pi grav nan peyi a. Jiskaprezan, plizyè milye timoun kontinye ap fè fas ak gwo obstak pou jwenn edikasyon, sitou akoz ensekirite, deplasman fòse ak povrete.Konstriksyon lekòl sa yo fè pati jefò pi laj ki vize retabli dwa pou edikasyon atravè tout peyi a. Lekòl nasyonal Ducis ak Plezans fè pati sèt (7) lekòl ki fenk konstwi nan Sid peyi a kòm repons ak tranblemanntè mwa dawout 2021, epi yo prevwa pou yo tout fini nèt anvan mwa jen 2026. De lekòl yo gen nèf (9) sal klas pou nivo primè ak segondè (premye sik), de (2) sal klas pou preskolè, yon kantin eskolè, yon blòk administratif, twalèt apa pou tifi ak tigason, epi yo genyen aksè ak enèji solè.Avèk de nouvo lekòl sa yo, sa fè 19 lekòl atravè kat (4) depatman nan Gran Sid la depi lane 2023, UNICEF deja apiye pou konstriksyon yo.Pandan inogirasyon yo, Vijonet Déméro, Minis Edikasyon Nasyonal ak Fòmasyon Pwofesyonèl, te deklare: « Se yon jou ki pote anpil espwa pou timoun yo, ki kounye a pral kapab devlope nan yon anviwònman ki pi apwopriye, ki respekte nòm jeni eskolè yo, epi ki pi an sante e pi byen adapte ak aprantisaj. Se tou yon nouvo demaraj pou pwofesè yo, ki pral santi yo pi alèz pou bay elèv lekòl sa yo yon pi bon sipèvizyon pedagojik. Rekonstriksyon lekòl sa a se prèv yon patenarya ki donnen ant Gouvènman Ayiti, UNICEF ak patnè nou yo; li kontribye dirèkteman nan ranfòse enfrastrikti lekòl nan Gran Sid la. »Pou pati pa li, Anbasadè Kanada an Ayiti, André François-Giroux, te fè konnen: « Nou vle remèt kominote yo enfrastrikti yo bezwen pou lavni yo, sitou atravè edikasyon, paske lekòl yo reprezante avni peyi a. » Lè l t ap pale ak timoun yo, li ajoute :
« Kèlkeswa chemen nou chwazi a, chè elèv yo, sa yo se pami ane ki pi enpòtan nan lavi nou. Pwofite yo nèt ale. Edikasyon pap sèlman louvri tout pòt devan nou, men li pral ede nou vin pi bon paran ak manm aktif nan kominote nou yo tou. »« Inogirasyon sa yo depase senpleman ouvèti nouvo bilding lekòl », se sa Geeta Narayan, Reprezantan UNICEF ann Ayiti, te deklare. « Yo pa sèlman pote nouvo espwa pou kominote kote aksè ak anviwònman aprantisaj ki an sekirite ak apwopriye toujou limite, men yo montre tou yon angajman kolektif pou asire chak timoun kapab aprann, grandi epi bati avni li nan yon anviwònman ki an sekirite e ki respekte diyite li. »Konstriksyon sa yo te posib gras ak yon kolaborasyon sere ant Gouvènman Ayiti, atravè Ministè Edikasyon Nasyonal ak Fòmasyon Pwofesyonèl (MENFP), ak otorite lokal yo. UNICEF remèsye Gouvènman Japon an, Fondasyon Carlos Slim, ak Gouvènman Kanada, ki se prensipal kontribitè nan Fon Fidyisye Plizyè Patnè yo, ansanm ak lòt patnè tankou Brezil ak Giyàn, pou sipò kontinyèl yo bay edikasyon ann Ayiti. Kontak medya : Salwa MoussaChèf kominikasyon ak pledwayeTel: +509 46971003Adrès elektwonik : samoussa@unicef.org