Ekip nu nan Ayiti

02 jiyè 2025, Sekretè jeneral Nasyonzini an, António Guterres, anonse li nome Carlos G. Ruiz Massieu, ki soti Meksik, nan pòs Reprezantan espesyal Sekretè jeneral epi Chèf Biwo Entegre Nasyonzini an Ayiti (BINUH). Sekretè jeneral la remèsye María Isabel Salvador, ki soti Ekwatè, pou devouman l ak sèvis li yo, pandan l te okipe pòs sila anvan M. Massieu.

Nan pòs sila, M. Ruiz Massieu charye vini plis pase 30 lane eksperyans nan fonksyon piblik ak diplomasi, nan nivo bilateral ak miltilateral. Kòm Reprezantan espesyal Sekretè jeneral nan peyi Kolonbi depi lane 2019, li te dirije Misyon verifikasyon Nasyonzini yo nan Kolonbi, kote li t ap swiv kijan Akò Lapè a t ap konkretize ant Gouvènman kolonbyen an ak geriya "Fòs ame revolisyonè Kolonbi an-Lame pèp la" (FARC-EP). Li te montre kapasite l pou l fasilite dyalòg epi li te montre lidèchip politik li nan pwosesis dyalòg pou lapè ant Gouvènman kolonbyen an ak Lame liberasyon nasyonal, ansanm ak lòt gwoup ame ilegal. Avan misyon sa a, li te prezidan Komite konsiltatif Asanble jeneral la pou zafè administratif ak bidjè soti 2013 pou rive 2018.

M. Ruiz Massieu gen yon pakou rekoni nan diplomasi. Li te okipe plizyè pòs nan gouvènman peyi Meksik anvan l te vin travay pou Nasyonzini. Li te nan Misyon pèmanant peyi Meksik nan Nasyonzini. M. Ruiz Massieu gen yon diplòm nan dwa li te fè nan Inivèsite ibewo-amerikèn nan Meksiko, e li gen yon metriz nan syans politik nan Inivèsite Esèks, Wayòm-Ini, ak yon espesyalizasyon sou Amerik latin. Apre espanyòl, li pale anglè ak fransè.

Gabriel Gualano de Godoy genyen anviwon 20 lane experyans imanitè an Ewòp, Amerik, Karayib ak Afrik. Li se aktyèl Chèf Biwo nasyonal Wo Komisarya Nasyonzini pou Refijye yo nan Pòtoprens, Ayiti.

Anvan sa, li te Reprezantan HCR (sig an fransè) nan Masedwàn Dinò (2023–2025), epi li te Chèf misyon nan Repiblik Dominikèn (2018–2023). Epitou, li kowòdone ekip pwoteksyon HCR nan peyi Meksik, epi okipe plizyò lòt pòs ki gen rapò ak pwoteksyon nan peyi Brezil, Ougannda ak nan Kostarika.

Gabriel gen yon doktora nan dwa, epi li espesyalize nan teyori ak filozofi dwa, nan Inivèsite Leta nan Rio de Janeiro (UERJ), nan peyi Brezil. Li gen tou yon mastè nan dwa, antwopoloji ak sosyete nan London School of Economics and Political Science (LSE), nan Wayòm Ini. Li gen tou yon lisans nan dwa li pran nan Inivèsite federal Parana (UFPR) nan peyi Brezil. Li se yon avoka ki enskri nan bawo distri federal nan Brezil.

Geeta Narayan, yon ekspè ki gen renome entènasyonal, vini nan UNICEF Ayiti nan mwa sektanm 2024. Gras ak plis pase ven lane eksperyans nan òganizasyon sila a, li gen yon ekspètiz san parèy nan zafè planifikasyon estratejik, kontwòl ak evalyasyon epi devlòpman pwogram. Avan sa, Geeta te jwe yon wòl kle nan ranfòse kilti òganizasyonèl UNICEF nan tout monn lan nan fè pwomosyon pou divèsite ak enklizyon. Angajman l pou dwa timoun te rive mennen l nan plizyè peyi kote l te travay san kanpe pou amelyore lavi sila ki pi vilnerab yo.

Avan li vin nan pòs sa, Geeta te konseye prensipal nan kilti òganizasyonèl pou UNICEF nan Nouyòk depi mwa jen 2019. Misyon l yo te mennen l tou nan Nouyòk soti 2001 pou rive 2004, nan peyi Vyètnam 2007 jiska 2010, nan peyi Afrikdisid 2010 pou rive 2012, nan peyi Jòdani 2012 rive 2016 ak Bosni Èzegovin soti lane 2016 pou bout nan mwa jen 2019.

Mesye Grégoire Goodstein se Chèf Misyon OIM an Ayiti depi 28 jen 2024.

Li te rantre nan Òganizasyon Entènasyonal pou Migrasyon (OIM) an 2000 kòm Chèf Misyon nan Kowasi (2000-2006), apre sa nan Sèbi (2006-2012), an Ayiti (2012-2016), epi li te Chèf divizyon relasyon ak donatè nan biwo santral OIM (2017-2023). Li te travay nan plizyè kontèks kriz ak aprè kriz, sitou ak « Action Contre la Faim » soti 1992 rive 1996 nan Somali, Sid Soudan, Sierra Leone, Burundi ak ansyen Yougoslavi, epi ak Louis Berger Ltd nan Filipin (1999-2000). Travay li te konsantre sou sekirite alimantè, refòm nan sektè sekirite ak jesyon migrasyon.

Li gen yon metriz nan politik sosyal ak planifikasyon pou peyi an devlopman nan London School of Economics ak yon diplòm lisans nan devlopman agrikòl entènasyonal nan University of California – Davis.

Li se yon sitwayen fransè.

Se nan lane 2022 Marie Goretti Nduwayo pran pòs nan ONIFANM an Ayiti. Li te entegre sistèm Nasyonzini an nan lane 1998 nan UNIFEM (ki vin tounen ONIFANM jodiya) ki te deside louvri yon biwo nan peyi Burundi pou te sipòte espesyalman kowòdinasyon Nasyonzini sou kesyon egalite jan ak otonomizasyon fanm ak patisipasyon yo nan negosyasyon lapè ak jesyon pwosesis ki tabli apre konfli yo eklate.

Depi lè sa a, Marie Goretti te okipe plizyè gwo fonksyon sòti nan Direktris pwogram peyi ki kouvri Burundi ak Komò jiska 2008, pase nan Reprezantant peyi pou Kamewoun (apati 2008) ak Kotdivwa (apati 2017). Nan 2 dènye peyi sa yo, li te reyisi akonpaye yo pou enplemante politik nasyonal ki pran an konsiderasyon kesyon jan, travay sou sitiyasyon fanm deplase ak rapatriye yo pou yo tounen nan zòn kote yo soti. Li te rive ede divès ministè yo fè evalyasyon ak odit aspè jan nan fonksyònman yo.

Marie Goretti vin an Ayiti apre li pase 4 lane kòm chèf lyezon ONIFANM anndan Inyon Afrikèn (UA) ak nan Komisyon Ekonomik pou Afrik (ECA), kote li t ap kowòdone inisyativ nan kontinan an ki konsène fanm ak tifi, tankou ajannda sekirite ak lapè fanm, lidèship politik feminen, jan nan aksyon imanitè. Marie Goretti te okipe tou plizyè gwo fonksyon entènasyonal pou yon ti bout tan. Dènye a se Reprezantant peyi pou Etyopi.

Anvan li te rantre nan Nasyonzini, Marie Goretti te premye kowòdonatris yon òganizasyon fanm nan Bouwonndi: Umbrella of Burundi women Organization; li te okipe wòl sa a apre li te reprezante lajenès peyi Bouwonndi nan katryèm konferans mondyal sou fanm, lapè ak devlòpman ki te fèt Bejin, nan peyi Lachin nan lane 1995. Marie Goretti kòmanse karyè pwofesyonèl li kòm chèf ekip teknik nan yon pwogram fòmasyon pou fanm UN Habita te genyen pou ede yo konstwi kay yo.

Marie Goretti Nduwayo gen yon metriz jeni nan Planifikasyon iben, ak plizyè sètifika nan jan ak devlòpman, jan ak lidèchip, jan ak gouvènans, jan, lapè ak sekirite ak anpil lòt ankò. Li se manman kat pitit ki genyen 29, 27, 25 ak 21 lane. Li pale anglè ak fransè. Li pale swayili ak kirundi ki se lang matènèl li.

Doktè Traore Modibo fèt 11 janvye 1967 nan peyi Mali. Li se nouvo chèf biwo OCHA nan peyi Dayiti. Soti lane 2008 pou rive 2024, li te chèf biwo nan peyi Nijè (de fwa), li te chèf biwo tou nan Zimbabwe, Kotdivwa ak Kamewoun.

Doktè Traore te travay ak OCHA nan plizyè biwo teren ki chita kò yo nan pati lès Repiblik Demokratik Kongo soti lane 2008 pou rive 2013. Li genyen plis pase 20 lane eksperyans pwofesyonèl nan Nasyonzini. Anvan li te rantre nan Òganizasyon entènasyonal sa a,li te travay nan diferan ONG entènasyonal nan peyi Kongo, Bouwoundi, Soudandisid, Somali ak nan peyi Lafrans soti lane 1997 pou rive 2002. Li te nan diferan pòs antanke doktè, kowòdinatè sante ak nitrisyon nan ONG Aksyon kont lafen epi li te direktè peyi pou yon ONG Britanik ki rele Children Aid Direct.

Doktè Traore genyen plis pase 25 lane eksperyans nan asistans imanitè, rekiperasyon, ak konsolidasyon lapè an Afrik. Li genyen yon ekspètiz nan sante piblik, yon doktora nan medsin jeneral, yon diplòm nan medsin twopikal li fè nan enstiti medsin twopikal vil Anvè (nan peyi Bèljik), li genyen tou yon mastè nan sante piblik Inivèsite lib Briksèl. Doktè Traore pibliye yon seri travay sou nitrisyon, sante manman ak pitit ak nan kadyoloji. Li se yon sitwayen peyi Mali ak Bèljik.

Wanja Kaaria-Ndoho se Reprezantant ak Direktris peyi pou Pwogram Alimantè Mondyal (PAM) an Ayiti. Li gen plis pase 26 lane eksperyans nan PAM. Anvan li vini Ayiti, li te okipe pòs Reprezantant ak Direktris peyi Kamewoun ak Sao Tome ak Prensipe (2020-2024).

Anvan sa, li te gen menm pòs sa a nan peyi Ganmbi (2018-2020). Li te Direktris annapre PAM nan Inyon Afrikèn ak nan Komisyon Ekonomik Nasyonzini pou Afrik kote l te baze Addis-Abeba, nan peyi Etyopi (2014-2018). Li te okipe pòs Direktris annapre biwo PAM nan peyi Senegal (2011-2014). Madan Kaaria-Ndoho se yon espesyalis nan swivi ak analiz. Li te travay kòm chèf swivi sekirite alimantè nan syèj òganizasyon an, Wòm, nan peyi Itali (2008-2011). Li te konseyè rejyonal pou swivi ak evalyasyon nan biwo rejyonal PAM pou Afrik Ostral ki Jwanèsbou, nan peyi Afrikdisid (2002-2008). Depi lè li rantre nan òganizasyon an nan lane 1997, li te okipe plizyè lòt fonksyon. Li travay nan lòt peyi tankou nan Soudan Disid ak nan Tannzani.

Anvan l te rantre nan Nasyonzini, li te travay pandan 6 lane pou gouvènman peyi Kenya. Madan Kaaria-Ndoho ki gen nasyonalite Kenya fè yon metriz nan planifikasyon ak jesyon devlòpman kote l te etidye nan Inivèsite Dòtmoun, nan peyi Almay, ak nan Inivèsite Syans ak Teknoloji Kumasi, nan peyi Gana. Li genyen yon lisans tou nan ekonomi fonsyè kote l te etidye nan Inivèsite Naywobi, nan peyi Kenya.