Ekip nu nan Ayiti

Mesye Grégoire Goodstein se Chèf misyon pou OIM an Ayiti depi 28 jen 2024.

Anvan sa, li te Chèf Divizyon Relasyon ak Bayè yo pou OIM depi Janvye 2024 kote li te baze Jenèv, nan peyi Laswis.

Depi 1991, Mesye Goodstein travay nan plizyè peyi nan kontèks ak anviwònman pòs-kriz ak tranzisyon tankou Beliz, Sèbi, Kwoasi, Somali, Sid Soudan, Syeraleyòn, Bouwonndi, Ansyen Yougoslavi ak Filipin. Pi fò pòs li okipe gen rapò ak sekirite alimantè, refòm sektè sekirite ak jesyon migrasyon.

Li gen yon lisans nan Devlòpman Agrikilti entènasyonal ak yon metriz nan Planifikasyon ak Politik sosyal nan peyi ki sou wout devlòpman.

Mesye Goodstein se yon fransè, li marye epi li gen 2 pitit fi.

Premye mas 2023, Sekretè jeneral LONI an, Mesye António Guterres, nommen Madan María Isabel Salvador ki sòti peyi Ekwatè kòm Reprezantant espesyal Sekretè jeneral ak Chèf Biwo Entegre Nasyonzini an Ayiti (BINUH)

Madan Salvador ranplase Madan Helen Meagher La Lime ki se yon amerikèn ki te okipe pòs sa a, ki jwenn rekonesans Sekretè jeneral la pou devouman li te bay ak angajman san fay li te genyen pou travay Nasyonzini an Ayiti.

Se plis pase 25 lane eksperyans Madan Salvador charye nan domèn jesyon, konsèy, politik ak diplomasi. Li te Prezidant Konsèy Administrasyon Galápagos (2013-2015), Reprezantant pèmanan peyi Ekwatè anndan Òganizasyon Eta Ameriken yo (2010-2013), manm Palman Kominote Andin (2009-2010). Li te tou Minis Afè etranjè, komès ak entegrasyon (2007-2008), Minis touris (2005-2007) peyi Ekwatè. Li gen yon pakèt eksperyans nan domèn jesyon nan sektè prive, gras ak pòs Direktris jeneral ak Reprezantant legal "Air France" nan peyi Ekwatè li te okipe soti 1995 pou rive 2005. Li se Direktris relayon ekstèn nan Inivèsite Las Américas (UDLA) nan peyi Ekwatè, yon pòs li ladan depi lane 2015.

Madan Salvador gen yon metriz nan administrasyon afè kote li te etidye nan Inivèsite Andrés Bello, nan peyi Chili, ak nan Inivèsite Europea de Madrid, nan peyi Espay. Li gen yon lisans nan lang ak sivilizasyon fransèz kote li te etidye nan Inivèsite Jenèv, nan peyi Laswis. Li ap fini yon diplòm nan dwa moun ak lanati nan UDLA, nan peyi Ekwatè. Anplis espanyòl ki se lang matènèl li, madan Salvador pale anglè ak fransè trè byen.

Se nan lane 2022 Marie Goretti Nduwayo pran pòs nan ONIFANM an Ayiti. Li te entegre sistèm Nasyonzini an nan lane 1998 nan UNIFEM (ki vin tounen ONIFANM jodiya) ki te deside louvri yon biwo nan peyi Burundi pou te sipòte espesyalman kowòdinasyon Nasyonzini sou kesyon egalite jan ak otonomizasyon fanm ak patisipasyon yo nan negosyasyon lapè ak jesyon pwosesis ki tabli apre konfli yo eklate.

Depi lè sa a, Marie Goretti te okipe plizyè gwo fonksyon sòti nan Direktris pwogram peyi ki kouvri Burundi ak Komò jiska 2008, pase nan Reprezantant peyi pou Kamewoun (apati 2008) ak Kotdivwa (apati 2017). Nan 2 dènye peyi sa yo, li te reyisi akonpaye yo pou enplemante politik nasyonal ki pran an konsiderasyon kesyon jan, travay sou sitiyasyon fanm deplase ak rapatriye yo pou yo tounen nan zòn kote yo soti. Li te rive ede divès ministè yo fè evalyasyon ak odit aspè jan nan fonksyònman yo.

Marie Goretti vin an Ayiti apre li pase 4 lane kòm chèf lyezon ONIFANM anndan Inyon Afrikèn (UA) ak nan Komisyon Ekonomik pou Afrik (ECA), kote li t ap kowòdone inisyativ nan kontinan an ki konsène fanm ak tifi, tankou ajannda sekirite ak lapè fanm, lidèship politik feminen, jan nan aksyon imanitè. Marie Goretti te okipe tou plizyè gwo fonksyon entènasyonal pou yon ti bout tan. Dènye a se Reprezantant peyi pou Etyopi.

Anvan li te rantre nan Nasyonzini, Marie Goretti te premye kowòdonatris yon òganizasyon fanm nan Bouwonndi: Umbrella of Burundi women Organization; li te okipe wòl sa a apre li te reprezante lajenès peyi Bouwonndi nan katryèm konferans mondyal sou fanm, lapè ak devlòpman ki te fèt Bejin, nan peyi Lachin nan lane 1995. Marie Goretti kòmanse karyè pwofesyonèl li kòm chèf ekip teknik nan yon pwogram fòmasyon pou fanm UN Habita te genyen pou ede yo konstwi kay yo.

Marie Goretti Nduwayo gen yon metriz jeni nan Planifikasyon iben, ak plizyè sètifika nan jan ak devlòpman, jan ak lidèchip, jan ak gouvènans, jan, lapè ak sekirite ak anpil lòt ankò. Li se manman kat pitit ki genyen 29, 27, 25 ak 21 lane. Li pale anglè ak fransè. Li pale swayili ak kirundi ki se lang matènèl li.

Wanja Kaaria-Ndoho se Reprezantant ak Direktris peyi pou Pwogram Alimantè Mondyal (PAM) an Ayiti. Li gen plis pase 26 lane eksperyans nan PAM. Anvan li vini Ayiti, li te okipe pòs Reprezantant ak Direktris peyi Kamewoun ak Sao Tome ak Prensipe (2020-2024).

Anvan sa, li te gen menm pòs sa a nan peyi Ganmbi (2018-2020). Li te Direktris annapre PAM nan Inyon Afrikèn ak nan Komisyon Ekonomik Nasyonzini pou Afrik kote l te baze Addis-Abeba, nan peyi Etyopi (2014-2018). Li te okipe pòs Direktris annapre biwo PAM nan peyi Senegal (2011-2014). Madan Kaaria-Ndoho se yon espesyalis nan swivi ak analiz. Li te travay kòm chèf swivi sekirite alimantè nan syèj òganizasyon an, Wòm, nan peyi Itali (2008-2011). Li te konseyè rejyonal pou swivi ak evalyasyon nan biwo rejyonal PAM pou Afrik Ostral ki Jwanèsbou, nan peyi Afrikdisid (2002-2008). Depi lè li rantre nan òganizasyon an nan lane 1997, li te okipe plizyè lòt fonksyon. Li travay nan lòt peyi tankou nan Soudan Disid ak nan Tannzani.

Anvan l te rantre nan Nasyonzini, li te travay pandan 6 lane pou gouvènman peyi Kenya. Madan Kaaria-Ndoho ki gen nasyonalite Kenya fè yon metriz nan planifikasyon ak jesyon devlòpman kote l te etidye nan Inivèsite Dòtmoun, nan peyi Almay, ak nan Inivèsite Syans ak Teknoloji Kumasi, nan peyi Gana. Li genyen yon lisans tou nan ekonomi fonsyè kote l te etidye nan Inivèsite Naywobi, nan peyi Kenya.