Ayiti: Chèf Nasyonzini an salye nouvo gouvènman an malgre defi yo kontinye

Sekretè Jeneral Nasyonzini an, António Guterres, jedi sa a, te salye seremoni inogirasyon nouvo Gouvènman Ayiti a, li ankouraje tout moun ki enplike yo pou kontinye fè pwogrè nan retabli enstitisyon demokratik atravè eleksyon.

Nouvo kabinè a, dapre rapò yo, ranplase konplètman tout minis gouvènman ansyen Premye Minis Ariel Henry a, ki te oblije demisyone anvan lè ane sa a, apre presyon ki soti nan gang kriminèl ki kontwole yon gwo pati nan nasyon zile a. Nan pòtfèy kle nouvo kabinè a gen fanm ki minis ladan.

Bezwen Sekirite

Pandan l tap adrese jounalis yo nan konferans pou laprès ki fèt regilye jedi sa a, Adjwen Pòtpawòl Nasyonzini an Farhan Haq te di ke "etap pozitif nan gouvènans tranzisyon" sa a ta dwe akonpaye nesesèman ak amelyorasyon sekirite an ijans.

"Sekretè Jeneral la kidonk raple apèl li pou yon deplwaman rapid Misyon Sipò Sekirite Miltinasyonal (MSS) an Ayiti pou sipòte Polis Nasyonal Ayiti pou yo rive adrese sitiyasyon sekirite an ijans," Selon sa Mesye Haq te di. 

Chèf Nasyonzini an te fè apèl tou bay Eta Manm yo pou asire misyon MSS la resevwa sipò finansye ak lojistik ijan li bezwen pou l ka reyisi, li te ajoute.

Asistans Imanitè

Pandan se tan, Biwo Kowòdinasyon Afè Imanitè (OCHA) fè konnen Nasyonzini ak patnè l yo kontinye sipòte moun ki deplase akoz vyolans nan kapital la, Pòtoprens. 

Ant 8 a 12 Jen, Pwogram Alimantè Mondyal la (PAM) – ajans asistans alimantè ijans Nasyonzini an – te distribye plis pase 40,000 pla cho bay plis pase 9,000 moun ki deplase nan vil la.

Depi nan konmansman ane a, PAM te distribye plis pase 1.1 milyon pla cho bay plis pase 120,000 moun ki deplase. 

An menm tan, Fon Popilasyon Nasyonzini an (UNFPA) te bay 900 kit diyite bay fanm ak tifi mwa pase a, ansanm ak uit klinik mobil ki bay sèvis sante seksyèl ak repwodiksyon epi sèvis ak sipò kont vyolans ki baze sou sèks.

Òganizasyon Entènasyonal pou Migrasyon (IOM) Nasyonzini an te ofri sipò sikososyal, sa gen ladan l apèl telefònik ak nan kan kote yo akeyi moun deplase yo (IDPs).

Enkyetid yo Kontinye

Sepandan, sitiyasyon an nan sid la toujou rete enkyetan, selon ki fè konnen kounye a gen plis pase 268,000 moun ki deplase, sa reprezante 95 pousan ogmantasyon  depi mwa Mas. 

Sistèm sante a kontinye ap fè fas a gwo defi, li paralize akoz dènye vag  vyolans yo mete sou plizyè ane  mank envestisman, Mesye Haq te di, li te remake kounye a, sèlman 20 pousan nan enstalasyon sèvis sante k ap fonksyone nòmalman nan Pòtoprens.

"Plan pou Repons Imanitè ane sa a, ki evalye a $674 milyon, se sèlman  23 pousan ki deja finanse ki evalye a $156 milyon," li te ajoute.

Plan an, si yo  finanse tout kantite a nèt, l ap rive ede  3.6 milyon nan moun ki pi vilnerab pami 5.5 milyon Ayisyen ki bezwen asistans. Zòn kle pou sipòte yo gen ladan pwoteksyon, swen sante medikal , dlo ak sanitasyon, ak sekirite alimantè.

Atik sa a te pibliye nan nouvèl Nasyonzini.