Ayiti : NASYONZINI salye pwogrè politik yo avèk enstalasyon Konsèy Prezidansyèl Tranzisyon an

Jounen jedi a NAZYONZINI felisite prestasyon sèman Konsèy prezidansyèl tranzisyon an ki te òganize nan Pòtoprens, Ayiti, epi li ankouraje nouvo otorite sa yo ak tout lòt pati enplike yo pou akselere tout dispozitif mizanplas gouvènans tranzisyonèl sa a.

“Nou te pran nòt nan lèt Ariel Henry a, ki gen dat yè a, kote li te demisyone kòm Premye Minis, ak nan piblikasyon ki fèt nan Jounal Ofisyèl la ki anonse Minis Finans lan, Michel Patrick Boisvert, antanke Premye Minis enterimè," selon sa pòtpawòl Sekretè Jeneral la, Stéphane Dujarric, te di nan yon ti pale ak laprès nan New York.

“Sekretè Jeneral la ap fè sonje apèl li fè pou gen yon deplwaman rapid Misyon Sekirite Miltinasyonal la an Ayiti pou ede Polis Nasyonal Ayisyen an fè fas kare ak sitiyasyon deplorab sekirite a," li te ajoute, epi ensiste pou chèf Nasyonzini an "fè apèl ak tout Eta Manm yo pou asire yo Misyon Pou Sekirite Miltinasyonal la resevwa sipò finansye ak lojistik li bezwen pou l reyisi travay sa a."

BINUH detèmine pou sipòte otorite yo

Biwo Entegrasyon Nasyonzini an Ayiti (BINUH) salye enstalasyon Konsèy Prezidansyèl Tranzisyon an, li jije sa antanke "nouvo opòtinite pou avanse nan direksyon pou restorasyon enstitisyon demokratik yo."

Nan yon mesaj sou Platfòm X la, BINUH di sa yo te manke se "angaje yo nan sipòte otorite peyi a nan efò yo ap fè pou kreye yon anviwònman nan lapè sosyal, san danje ak posibilite pou òganize eleksyon ki kredib, kote gen bon patisipasyon ak enklizyon.

Konsèy Prezidansyèl Tranzisyon an Ayiti a ki gen 9 manm kounya a dwe mete sou pye yon nouvo gouvènman epi nome yon premye minis.

Sa te pran plizyè semèn pou fè gwo negosyasyon sa a, avèk anpil tòde vire, pou te mete Konsèy la sou pye jodi a, pandan kapital la, Pòtoprens, toujou anba ravaj vyolans gang  yo ak pandan peyi a ap fè fas ak yon gwo kriz imanitè. San yon prezidan ni yon palman, depi 2016 Ayiti poko fè okenn eleksyon.

Gwo kriz imanitè

Nan yon ti pale ak laprès nan biwo jeneral Nasyonzini nan New York, Direktè Egzekitif adjwen Pwogram Alimantè Mondyal la (PAM), Carl Skau,  te salye enstalasyon Konsèy Tranzisyon an.

« Mwen kapab konfime jan sitiyasyon an vreman difisil, ak yon gwo kriz ki gen yon gwo  gwo enpak imanitè. Se pi move sitiyasyon imanitè  Ayiti fè fas depi tranbleman tè 2010 la », selon sa Skau te di, li te vizite peyi a dènyèman pou evalye bezwen imanitè yo. Li raple tou gen plizyè milyon moun k ap fè fas ak gwo pwoblèm ensekirite alimantè.

Li te ensiste pou l di vrè kriz sekirite a konsantre nan Pòtoprens epi sitiyasyon an yon ti jan pi trankil lòt kote yo.

« Men sa pa vle di enpak imanitè kriz sekirite  ap fè nan Pòtoprens pa gen efè lòt kote yo. Gen anpil deplasman, sa afekte komès ak ekonomi an e vin gen enflasyon e sa fè kriz la afekte tout kote », selon sa gwo responsb ofisyèl PAM lan fè remake. Sepandan, repons imanitè yo ka rive fè diferans, selon sa li di, avèk yon repons an ijans nan rejyon Pòtoprens lan ak sipò pou gen devlopman nan rès peyi a.

PAM rive ede  apeprè 500,000 moun  chak mwa e sa gen ladan yon pla manje cho ak manje anbwate tou prepare li distribiye nan kapital la, men tou, lòt pwogram tankou kantin nan lekòl li bay nan lòt zòn nan peyi a.

PAM ap sipòte tou rès kominote imanitè a ak fanmi Nasyonzini an ki mete sèvis transpò ayeryen li yo disponib.  Ajans Nasyonzini an planifye tou pou mete sou pye sipò lojistik k ap pèmèt gen vòl ayeryen ofiramezi ayewopò entènasyonal la ouvè, epitou ap gen bato pou  transpòte machandiz si wout yo ta rete fèmen oswa yo ta vin refèmen ankò, selon sa Skau di.

Li te souliye tou pou l di pou sipò politik ak sekirite a mache ak yon gwo repons imanitè solid. P ap ka  gen okenn siksè nan domèn politik si nou pa ogmante asistans nou bay pèp la," selon sa li te di.

Atik sa a te pibliye nan nouvèl Nasyonzini.