Ayiti : Chèf Nasyonzini an vle plis pwogrè toujou nan tranzisyon politik la

Pòt pawòl  Nasyonzini  an fè konnen : « Antonyo Guterès  ki  se sekretè jeneral  Nasyonzini an bat gwo bravo la kontantman pou akeyi  nominasyon Gari Koni nan  pòs premye minis pou yon tibout tan nan peyi  Dayiti e li espere tou pou plis pwogrè  fèt  toujou nan etabli bonjan aranjman pou gouvènman tranzisyon an » .

Pòt pawòl  la, Estefàn Dijarik  fè konnen  nan yon pwent près  ke chèf Nasyonzini an ankouraje tout aktè ayisyen , ki konsène yo e ki enterese ak siksè peyi Dayiti , pou travay ansanm pou asire pwogrè nan tranzisyon an ki vize  remete enstisyon demokratik yo kanpe atravè  bonjan eleksyon.

Sekretè jeneral la mete aksan tou sou enpòtans pou asire yon tranzisyon politik an Ayiti ki enklizif kote tout moun ladan l’ e an patikilye nan nonmen fanm nan pozisyon pou pran desizyon. E li te ensiste pou l montre li toujou bon pou pwogrè nan politik tranzisyon an gen ladanl sekirite ki nesesè e  ki paka tann ankò a. Sekretè jeneral la tounen mande yon lòt fwa ankò deplwaman rapid misyon sipò sekirite miltinasyonal la nan peyi Dayiti pou l ka ede polis nasyonal la fè fas ak sitiyasyon difisil sekirite a e li mande prese prese  pou tout leta manb yo asire misyon sa a jwenn san pèdi tan sipò finansye ak lojistik ke l bezwen pou l byen fè travay li.

Vòl kago imanitè

Pòt pawòl la te tou fè konprann  vòl kago imanitè sèvis ayeryen imanitè Nasyonzini  te opere a, te kapab vole sòti Panama pou ateri ayewopò pòtoprens  nan Jedi . E li te fè konnen se premye fwa yon vòl kago Nasyonzini te ateri  nan kapital la depi  espas twa ( 3) mwa. 

Vòl la te transpòte apeprè 15 tòn medikaman ak founiti medikal pou sipòte operasyon UNICEF ak OMS oganizasyon mondyal lasante.

Mesye Dijarik te di, sa a pral kore operasyon vital yo  pandan ensekirite a ap kontinye anpeche moun yo jwenn moso laswenyay  sitou nan zòn metwopolitèn ki nan mitan  kapital pòtoprens lan ak depatman latibonit la. Mesye a fè konprann tou, otorite ayisyen yo , OMS ak ONG local yo pa sispann bay yon latriye sèvis ak moun k ideplase kite lakay yo , tankou depistaj malnitrisyon, prevansyon kolera ak sipò sikososyal .

Li te di  : “nou espere ouvèti gradyèl nan ayewopò entènasyonal la ap pèmèt plis founiti kapab rive nan peyi Dayiti poutèt sa sipò donatè yo esansyèl anpil eli presize ke plan repons imanitè pou peyi Dayiti ki te evalye ak 674  milyon dola se sèlman 142 milyon ki debloke e sa sèlman  reprezante 21 pousan nan kantite yo te prevwa a.

Rekritman timoun nan gwoup ame yo 

Bò kote pa l, UNICEF peze bouton alam li konsènan gwoup ame yo kap rekrite epi itilize timoun nan mitan yo annAyiti. 

Daprè estimasyon Nasyonzini, gwoup ame yo genyen ladan yo  30  rive nan 50% timoun ki viktim tout kalite zak tankou abi ak eksplwatasyon nan yon kontèks sosyal ki frajil anpil e kote se vyolans  kap mennen  ekonomi ak politik la e ki lakoz plizyè pati nan peyi a plonje byen fon nan dezòd.

Nan peyi Dayiti, kote 90% nan popilasyon an ap viv nan povrete e timoun yo ap viv nan yon sitiyasyon ki pa kòdjanm  ditou kote 3 milyon nan yo toujou bezwen asistans imanitèki  ijan anpil . Ajitasyon politik yo k ap vale tèren depi plizyè lane melanje ak kondisyon ekonomik ki katastwofik te pèmèt byen fasil pwopagasyon gwoup ame yo e ki rive fòse yon kantite timoun nan peyi a rantre nan mitan yo akoz  afè pabon ak manke pwoteksyon e tout sa yo se yon vyolasyon nan dwa timoun yo genyen.

Katrin Risel ki se direktè egzekitif UNICEF di : “ timoun nan peyi Dayiti yo pran nan yon sik visye ki fè yo soufri anpil , kote dezespwa ak move lavi pouse yo rantre nan gwoup ame  yo sitou akoz vyolans, povrete  ak  efondreman system nan  ki te dwe pwoteje yo . Timoun gwoup ame yo rekrite yo, fè divès travay tankou kwit manje , kanpe yon kote pou veye sak kap pase  epi fe kout dwèt  , fè netwayaj  oswa menm jwe wòl madanm. yo tout pèdi non sèlman inosans yo men tou yo pèdi tout koneksyon ak kominote yo. Sitiyasyon  sa a  gen gwo konsekans trajik sou chak lavi timoun ki konsene yo.

Daprè chèf UNICEF la, li nesesè tout bon vre pou  pran bonjan mezi kap garanti priyorite pwoteksyon ak byennèt timoun nan peyi Dayiti .E poze aksyon san okenn danje kap mete yon fen nan asosyasyon  timoun yo ak gwoup ame yo e asire reyentegrasyon  yo nan sosyete a,  epi fè yo jwenn san danje tout sèvis ak sipò yo merite.

Dapre dènye estimasyon yo, plis pase yon demi milyon timoun nan peyi Dayiti ap viv nan katye gwoup ame yo kontwole yo e sa ogmante ris pou yo rekrite yo oswa pou yo sibi tout kalite vyolans .Rekritman ak itilizasyon timoun sa yo nan gwoup ame yo se yon vyolans grav dwa yo , e mete timoun nenpòt  laj nan gwoup ame yo se yon vyolasyon  klè nan lwa entènasyonal. Se poutèt sa , UNICEF ki te akouraj ministè yo tankou ministè levasyon,ministè lajistis ,ministè travay ak  ministè afè sosyal pou travay ansanm sou reyentegrasyon timoun ki te asosye ak gwoup ame yo.

Atik sa a te pibliye nan nouvèl Nasyonzini.