Madanm Winnie BYANYIMA, Direktris egzekitif ONUSIDA epi Sekretè jeneral annapre NasyonZini fè yon vizit solidarite an Ayiti

Pandan misyon an, madanm Byanyima bat bravo pou gwo pwogrè Ayiti fè nan batay pou kwape VIH nan yon kontèks difisil. Ayiti fè pwogrè nan reyalizasyon objektif trètman 95-95-95 lan pou 2030, kote gen depistaj ki fèt sou 87% moun k ap viv ak VIH la, 96% moun k ap viv ak VIH la benefisye trètman epi gen 85% moun ki sou trètman yo nan estad endetektab. Depi 2010, kantite nouvo moun ki enfekte ak VIH la bese a 34% epi kantite moun k ap mouri akoz VIH bese a 75%. Avèk sipò PEPFAR ak Fon Mondyal, òganizasyon kominotè nan sosyete sivil la gen anprent yo nan gwo pwogrè sa yo gras ak apwòch tou nèf epi ki fleksib yo adopte nan fason yo bay sèvis yo. Nan echanj madanm Winnie te gen ak yo, li bat bravo pou detèminasyon ak rezilyans pèp Ayisyen an ki se yon pèp ki gen anpil fyète, ki toujou sèvi yon sous enspirasyon pou lemonn malgre yo nan kriz.

Winnie Byanyima deklare: « Se premye fwa mwen vizite yon peyi ki gen yon rezo ki gen 26 òganizasyon ki fòme ak moun k ap viv ak VIH. Anndan òganizasyon sa yo, mwen wè moun ki gen anpil kouraj k ap batay kont estigmatizasyon epi k ap batay pou fè respekte dwa yo ». 

Li te fè konnen tou vwa medam yo enpòtan nan pwosesis pou chèche lapè ak sekirite ki se kondisyon esansyèl pou pwoteje kategori moun vilnerab yo tankou sila k ap viv VIH. Se tou kondisyon k ap ede nan batay pou kwape vyolans ki baze sou rapò dezekilibre fanm ak gason. Winnie di « Twò souvan, yo mete medam yo sou kote, m ap pote pawòl nou tout kote m prale ».

Direktris la te temwen kalite defi ki genyen akoz kriz sekiritè ak imanitè ki afekte espas ki bay sèvis sante ak lòt kalite sèvis pou moun k ap viv ak VIH. Madanm Byanyima di li solidè ak moun ki afekte pa ensekirite gang yo kreye, pandan li montre enkyetid li genyen lè li wè kantite moun k ap mouri chak jou ak kantite lòt moun vilnerab ki viktim vyolans seksyèl. 

« M te gen chans tande reprezantan òganizasyon fanm yo an Ayiti sou defi y ap fè fas ak yo ki gen rapò ak egalite fanm ak gason epi vyolans seksis, ak sou fason ONUSIDA ak lòt patnè yo kapab ede yo nan travay yo », se sa madanm Byanyima deklare. « Pawòl fanm yo esansyèl lè gen diskisyon sou pi bon estrateji pou lapè ak sekirite kapab tabli. Nou dwe kontinye jefò k ap fèt pou kwape vyolans k ap fèt sou fanm ak tifi. Se yon pwen enpòtan pou tout sistèm NasyonZini an.

Winnie Byanyima te gen chans rankontre otorite tranzisyon an tankou manm Konsèy Prezidansyèl Tranzisyon an (KPT), Premye Minis lan ak kèk minis nan gouvènman an, kò diplomatik la ak patnè teknik ak finansye yo. Nan rankont sa yo, li pa t rate opòtinite pou souliye ijans ki genyen pou rezoud pwoblèm ensekirite gang yo kreye an Ayiti, pandan l mande pou gen yon estabilite politik pou pa gaspiye tout pwogrè ki fèt nan batay kont VIH, pou amelyore sekirite, pèmèt èd imanitè a kontinye epi kreye kondisyon pou gen bon jan dyalòg, otonomizasyon sosyo ekonomik ak yon pi bon enplikasyon fanm yo nan gouvènans politik... 

« Kominote entènasyonal la dwe mobilize pou rete bò kote pèp Ayisyen an nan jefò l ap fè pou estabilite tounen, epi pou bay garanti pwoblèm VIH la ap rete yon priyorite nan ajannda politik mondyal la ». Se sa Direktris egzekitif ONUSIDA deklare nan finisman misyon an, pandan li bay garanti NasyonZini ap toujou sipò pledwaye pou mobilize plis resous pou batay kont VIH/Sida nan lemonn, espesyalman an Ayiti.

Pou misyon sa a, Direktris egzekitif ONUSIDA a te jwenn tout akonpayman madanm María Isabel Salvador, Reprezantan espesyal Sekretè Jeneral la ak Chèf Biwo Entegre NasyonZini an Ayiti (BINUH) ak Madanm Ingeborg Ulrika Ulfsdotter Richardson, Kòdonatris rezidant ak imanitè an Ayiti.

Pou plis enfòmasyon sou ONUSIDA, vizite sit entènèt UNAIDS, epi swiv nou sou Facebook, X, Instagram ak YouTube.

Kontak :
Daniel de Castro │ ONUSIDA Amerik Latin ak Karayib yo│ decastrod@unaids.org │ +507 6998 3175
Christian Mouala │ ONUSIDA Ayiti │moualac@unaids.org│ +5094777190